Je maudis l'heure et le temps et le jour,
      La semaine, le lieu, le mois, l'année
      Et les deux yeux dont je vis la douceur
      De ma dame, qui ma joie a finée.
      Et si maudis mon coeur et ma pensée,
      Ma loyauté, mon désir et m'amour
      Et le danger qui fait languir en pleur
      Mon dolent coeur en étrange contrée.
 
      Et si maudis l'accueil, l'attrait, l'atour
      Et le regard dont l'amour engendrée
      Fut en mon coeur, qui le tient en ardeur,
      Et si maudis l'heure qu'elle fut née,
      Son faux-semblant, sa fausseté prouvée,
      Son grand orgueil, sa durté où tendreur
      N'a ni pitié, qui tient en tel langueur
      Mon dolent coeur en étrange contrée.
 
      Et si maudis Fortune et son faux tour,
      La planète, l'heur, la destinée
      Qui mon fol coeur mirent en telle erreur
      Qu'oncques de moi fut servie n'aimée.
      Mais je prie Dieu qu'il gard sa renommée
      Son bien, sa paix, et lui accroisse honneur,
      Et lui pardonn' ce qu'occit à douleur
      Mon dolent coeur en étrange contrée.