Douce dame jolie,
Pour dieu ne pensez mie
Que nulle ait seigneurie
Sur moi fors vous seulement.

    Qu'adès sans tricherie
    Chérie
    Vous ai et humblement

    Tous les jours de ma vie
    Servie
    Sans vilain pensement.

Hélas! et je mendie
D'espérance et d'aïe;
Dont ma joie est fenie,
Se pité ne vous en prend.

Douce dame jolie...

    Mais vo douce maistrie
    Maistrie
    Mon coeur si durement

    Qu'elle le contralie
    Et lie
    En amour tellement

Qu'il n'a de riens envie
Fors d'être en vo baillie;
Et se ne li ottrie
Vos coeurs nul aligement.

Douce dame jolie...

    Et quand ma maladie
    Guérie
    Ne sera nullement

    Sans vous, douce ennemie,
    Qui lie
    Êtes de mon tourment,

À jointes mains déprie
Vo coeur, puis qu'il m'oublie,
Que temprement m'occie,
Car trop langui longuement.

Douce dame jolie...