Recherche qui voudra cet Amour qui domine,
Comme lon dit, les Dieux, les hommes, les esprits,
Qu’on feint le premier né des Dieux, et qui a pris
Eternellement soing de ceste grand’machine :
   Dont l’arc, le traict, la trousse, et la torche divine
N’a rien que la vertu pour son but et son pris,
Sans passions, douleurs, remords, larmes et cris :
Quant à moy, je croiray que tel on l’imagine,
   Et qu’au monde il n’est point : quant aux faulses amorces
De l’autre aveugle Amour j’en depite les forces.
Mais je croy si Amour aucun nous vient des Cieux,
   C’est lors que deux moitiez par mariage unies,
Quittent pour l’amour vray dont se paissent leurs vies,
Tout amour fantastique, et tout amour sans yeux.