Ne reprenez, Dames, si j’ay aymé :
   Si j’ay senti mile torches ardentes,
   Mile travaus, mile douleurs mordentes :
   Si en pleurant, j’ay mon tems consumé,
Las que mon nom n’en soit par vous blamé.
   Si j’ay failli, les peines sont presentes,
   N’aigrissez point leurs pointes violentes :
   Mais estimez qu’Amour, à point nommé,
Sans votre ardeur d’un Vulcan excuser,
   Sans la beauté d’Adonis acuser,
   Pourra, s’il veut, plus vous rendre amoureuses :
En ayant moins que moy d’occasion,
   Et plus d’estrange et forte passion.
   Et gardez vous d’estre plus malheureuses !