Assié toi là, GVYON, & me dy des nouuelles,
Nous nous sommes assez embrassez et cheriz,
Que dit on à la court, que fait on à Paris,
Quels Seigneurs y void on, & quelles damoiselles ?
 
   Verrons nous point de fin à ces guerres cruëlles ?
Le froment & le vin sont ils point encheris ?
Et parmy tant de maulx ne voit on point periz
Tant d’emprunts, de taillons, d’imposts & de gabelles ?
 
   As-tu point apporté quelque liure nouueau ?
As tu point veu Ronsard, ou Paschal, ou Belleau ?
Que dit on que fait on? Dy moy ie te demande,
 
   Le Ieusneur est il point de parler dispensé ?
Le bastiment du Louure est il fort auancé ?
Que dit on au palais, & que fait la Normande ?