Madame ie vous donne vn oiseau pour estreine,
Duquel on ne sçauroit estimer la valeur,
S’il vous vient quelque ennuy, maladie & douleur,
Il vous rendra soudain à vostre aise & bien saine.
   Il n’est mal d’estomach, colique ny migraine
Qu’il ne puisse guerir : mais sur tout il a l’heur
Que contre l’accident de la pasle couleur,
Il porte avecque soy la drogue souueraine.
   Vne Dame le vid dans ma main l’autre iour,
Qui me dit que c’estoit vn perroquet d’amour,
Et dés lors m’en offrit bon nombre de monnoye.
   Des autres perroquets il differe pourtant,
Car eux fuyent la cage & luy il l’aime tant,
Qu’il n’y est iamais mis qu’il n’en pleure de ioye.