Pendant que vostre main, docte, gentille, et belle,
Va triant dextrement les odorantes fleurs
Par ces prez esmaillez en cent et cent couleurs,
Par le sacré labeur de la trouppe immortelle :
   Gardez qu’Amour tapy sous la robbe nouvelle
De quelque belle fleur, n’évente ses chaleurs,
Et qu’au lieu de penser amortir vos douleurs,
D’un petit trait de feu, ne vous les renouvelle.
  En recueillant des fleurs la fille d’Agenor
Fut surprise d’Amour, et Proserpine encor,
L’une fille de Roy, l’autre toute Deesse :
  Il ne faut seullement que souffler un bien peu
Le charbon eschaufé, pour alumer un feu
Duquel vous ne pouriez en fin estre maitresse.