Durant la belle nuit, dont mon ame rauie
   Preferoit les clartez à celles d’vn beau iour,
   I’escoutois murmurer, au milieu de la Cour,
   Mille voix de loüange, & mille autres d’enuie.
 
Ie ne sçay quelles morts plus douces que la vie,
   Faisoient sentir aux cœurs les charmes de l’Amour ;
   Et de mille beautez, qui brilloient à l’entour,
   L’vn tenoit pour Caliste, & l’autre pour Syluie.
 
Quand Philis vint monstrer ses yeux armez de dards,
   De tous les assistans, attira les regards,
   Et des autres obiets effaça la memoire.
 
Sa presence à l’instant fit sentir sa vertu,
   Et mon cœur fut saisi d’vne secrette gloire,
   De la voir triompher, sans auoir combatu.